आरजु भाउजुको झल्को दिने काफ्ले भाउजु भन्दै चौतर्फी आलोचना
राष्ट्रिय स्वतन्त्र पार्टी (रास्वपा) को प्रथम महाधिवेशनमा सहभागी हुन चितवन पुगेका प्रधानमन्त्री बालेन्द्र शाह मंगलबार काठमाडौं फर्किएका छन्। पत्नी सबिना काफ्ले र छोरीसहित राजधानी फर्किने क्रममा खिचिएको एउटा तस्बिर भने सामाजिक सञ्जालमा चर्चाको विषय बनेको छ।
सार्वजनिक भएको तस्बिरमा प्रधानमन्त्री शाहले छोरीलाई बोकेको देखिन्छ भने उनकी पत्नी सबिना काफ्लेको हातमा मोबाइल फोन छ। परिवारसँग रहेको झोला भने सुरक्षार्थ खटिएका व्यक्तिगत सुरक्षा अधिकृत (पिएसओ) ले बोकेको देखिएपछि सामाजिक सञ्जालमा बहस सुरु भएको हो।
तस्बिर सार्वजनिक भएसँगै कतिपय सामाजिक सञ्जाल प्रयोगकर्ताले विगतमा यस्तै घटनामा उठाइएका प्रश्नहरू स्मरण गर्दै अहिले पनि समान मापदण्ड लागू हुनुपर्ने धारणा व्यक्त गरेका छन्। उनीहरूले सार्वजनिक पदमा रहेका व्यक्तिका परिवारका सदस्यले सुरक्षाकर्मीलाई व्यक्तिगत सामान बोकाउन नहुने तर्क गरेका छन्।
सामाजिक सञ्जालमा प्रतिक्रिया जनाउँदै केही प्रयोगकर्ताले ‘भाउजू नयाँ होस् वा पुराना, व्यवहार उस्तै’ भन्दै आलोचना गरेका छन्। उनीहरूको भनाइमा व्यक्ति परिवर्तन भए पनि विशेषाधिकारको अभ्यासमा खासै परिवर्तन नदेखिएको आरोप छ।
यद्यपि, सुरक्षाकर्मीले झोला बोकेको विषय सुरक्षा प्रोटोकलअन्तर्गतको सामान्य व्यवस्था हो वा व्यक्तिगत सुविधा उपलब्ध गराइएको अवस्था हो भन्नेबारे कुनै आधिकारिक प्रतिक्रिया आएको छैन।
सामाजिक सञ्जालमा भने यस विषयमा फरक–फरक धारणा देखिएका छन्। केहीले यसलाई सामान्य सुरक्षा व्यवस्थापनको हिस्सा मानेका छन् भने अन्यले सार्वजनिक पद धारण गरेका व्यक्तिहरूले साना व्यवहारमा पनि संवेदनशीलता देखाउनुपर्ने बताएका छन्।
एउटा साधारण देखिने तस्बिरले फेरि एकपटक सार्वजनिक जीवनमा विशेषाधिकार, नैतिकता र सार्वजनिक छविबारे बहस सुरु गराएको छ।
Comments